mi ultimo adios

Hindi lang isa. Hindi lang din dalawa. At mas lalong hindi lang din tatlo.

Hindi ko alam kung paano ako napabilang sa mga naging babae ng buhay mo. Ilang mga gabi din na hindi ako nakatulog sa pagluluksa dahil sa pagkawala mo. Pero ngayon, masasabi kong okey na ulit ako.

Tuluyan na akong na-immune sa katotohanang break na tayo.

Inaamin ko, naging mahirap iyon sa parte ko. Ang mabuhay sa pang-araw-araw na hindi ka na ksama. Umuwi at tumawid sa kalsada ng mag-isa. Maghintay na makita ang pangalan mo sa inbox ko.          

Ngunit kailangang tanggapin ang katotohanan.

Hindi na tayo nagyon.

Hindi mo na ako gusto.

May bago ka na namang gusto.

At gusto mo kayo naman nagyon.

Bago pa ako napasaiyo noon, marami ng dumaan saiyo.

Ilang pares ng mga kamay na rin ang nahawakan ng mga pasmado mong kamay. Libo na rin ang nawaldas mo sa dinami-dami ng mga naging ka-date mo. Pudpod na rin ang keypad ng telepono mo sa kakatext mo sa pinagpipilian mo. Ubos na rin ang gel na pinampoporma mo sa buhok mo.

Chikboy ka nga talaga–gaya ng sabi ng iba.

Paano naaatim ng iyong konsensya ang iyong mga pinaggagagawa. Masyado kang nag-eenjoy sa pagpipiyesta sa mga kababaihang tulad ko.

Wala kang tumatagal na relasyon. Kadalasan ay napakahaba na ang isang buwan sa lagay mo.

Ang dali mong magsawa. Hindi ka na nakuntento. Boy, walang perpekto sa mundo. Huwag kang umasang mahahanap mo ang lahat ng nanaisin mo sa isang babae.

Napakabilis mong magpalit ng nobya. Animo’y parang laging may nakareserba.

Ang atat mong magkaroon ng panibagong relasyon. Mamamatay ka ba kapag wala kang girlfriend? Adik ba? Haha.

Pero kung sabagay, wala nga naman akong masabi. Hindi ka naman ganun ka-guwapo pero may itsura. Singkit ang mga mata mo pero keri lang, akma naman sa mukha mo. Hindi ka naman ganun katalino pero may ibubuga ka naman dahil sa talent mo.

Bakit nga ba hanggang ngayon ay pinapakialam pa kita?

Malamang concern lang ako. Marahil ay may katiting na tama pa nga rin siguro ako saiyo.

Ngunit, kung magpapatuloy iyang ugali mong iyan, mag-iingat ka.

Naisip ko lang bigyan ka ng babala.

Kung hindi ka nakukuntento sa dinami-dami ng mga naging eks mo, baka hindi babae ang hanap mo.

Malay ko, malay mo, malay natin, baka lalake pala ang gusto mo.